کیم اولسا درده مبتلا رقیه دامنین دوتار
گلر مریض بی دوا رقیه دامنین دوتار
ویروب مدال افتخار او مه جماله فاطمه
آلاندا شامی آدینه یازوب قباله فاطمه
علم وروب خرابیه همان سه ساله فاطمه
گیدر غریب و آشنا رقیه دامنین دوتار
گر ایتسه خاک پاسینه نظر بو اوچ یاشندا قیز
ایدر نظرده تپراقی گهر بو اوچ یاشندا قیز
دی حاجتون نه ایسته سن ویرر بو اوچ یاشندا قیز
غم اهلی دلده مین نوا رقیه دامنین دوتار
اگر مریض عشقیسن واروندی تربته نیاز
توسل ایله صدقیله رقییه پس از نماز
ئوزی او قبری گورمیوب ولی سنه یازار جواز
که عاشقان کربلا رقیه دامنین دوتار
نجه سه ساله عاشقی من اوخشادیم اوشاقلارا
اوشاق مگر باخا بیلر قانا باتان دوداقلارا
سلام او راه شامیده قباراولان ایاقلارا
ادبله سالک وفا رقیه دامنین دوتار
سلام او نازدانه نین جلال و افتخارینه
که دردمندلر گیدوب دخیل اولار مزارینه
گر اولسا معنوی گوزون باخارسان اعتبارینه
فرشتگان نه سما رقیه دامنین دوتار
اوخوردا قبری که سالوب شعاعی شامه شعشعه
کیچیک رواقمیش صورا تاپودی بیله توسعه
هامی بلور بو مطلبین نیازی یوخدی مرجعه
ایشیتسه کیم یانایانا رقیه دامنین دوتار
مصمم اولدی شیعه لر اوگون که عزته چاتا
هامی مجاور ایولری آلوب خرابیه قاتا
دیولله بیر نفر ایوین موافق اولمادی ساتا
که غافلیدی، اولیا رقیه دامنین دوتار
گیچوبدی بیر زمان ایشی اونوندا دوشدی مشگله
واریدی بیر گوزل قیزی چوخ اوخشاداردیلار گوله
ایله مریض اولوب او قیز گروبله آز قالور ئوله
اونا کیم ایستسه شفا رقیه دامنین دوتار
زبسکه نا امید اولوب الینده چاره قالمادی
عریضه یازدی هر یره مریضه سی ساغالمادی
گلوبدی شیعه بیر طبیب دوا یازوب پول آلمادی
دیدی غم اهلی بینوا، رقیه دامینن دوتار
بس اعتقادی سُستیدی دیدی قبول ایدیم نجه
منیم قیزیما هیچ طبیب ایدنمیوب معالجه
رقیه گلدی از قضا بوخوسونا همان گجه
آتا باخور مریض بالا رقیه دامنین دوتار
سوروشدی کیم سن ای خانم که مایلم یوزون گورم
بویوردی دختر حسین من اوچ یاشیندا دکترم
عقیدن اولسا گلمیشم مریضوه شفا ویرم
دیمه ندندی هر گدا رقیه دامنین دوتار
رقییم سیزه گوره قبار اولوب ایاقلاریم
ایونده یوخ گوزوم منیم کهوار بهشته باغلاریم
حرم کیچیکدی زحمته دوشور گلن قوناقلاریم
گورورسن اهل هر قُرا رقیه دامنین دوتار
ئوزون ایتوردی اول قیزین گورنده منقلب حالین
سؤوندی دوردی باغلادی بئلینه شیعه لیق شالین
تشکر ایتماقا قاچوب خرابیه ایاق یالین
اولوبدی حاجتی روا رقیه دامنین دوتار
دیدی فدا اولوم خانم جلال و عزّ و جاهیوه
اجازه ویرسن اوزقویوم شرفلی بارگاهیوه
عنایتیله ایلدون نظر بو خاک راهیوه
یا سائل ایندی بی ریا رقیه دامنین دوتار
من ایندی دستخالیم نه وار خانم سنونکیدی
ایویمون ارزشی ندور منیم جانیم سنونکیدی
قیزیم کنیز ئوزوم غلام ادیم سانم سنونکیدی
آتا بالا گیوب قرا رقیه دامنین دوتار
بلی آدی رقیه نین هزار درده چاره دی
نو نکته لی سوز عاقله کنایه و اشاره دی
یری خرابه اولسادا ایشقلی بیر ستاره دی
سهیل و زهرا و سها رقیه دامنین دوتار
همین ستاره بیر گیجه گوروشدی آفتابیلن
طبقده گون طلوع ایدوب یوزونده قان حجابیلن
وفالی میزبان یودی او قانلی اشگنابیلن
دیدی فراق اودی بابا رقیه دامنین دوتار
بو خسته عاشقه بابا دوباره جان گتورموسن
معّیّتونده نه قوشون نه پاسبان گتورموسن
سفرده ارمغان منه دوداقدا قان گتورموسن
باخاندا نار ابتلا رقیه دامنین دوتار
خرابه ده داریخمشام یوخومدی همدم آی بابا
باشیمسز اوستن ایلمه بو سایه نی کم آی بابا
اوقدریس آختاروب سنی قوجالدی عمم آی بابا
بو غمده شعله بلا رقیه دامنین دوتار
من آشیانه سی یانوب قفسده پر چالان قوشام
یوروبدی اؤچلار منی قنادلاری یانان قوشام
گوروبسن هیچ یارالی قوش؟ یارالی من همان قوشام
شرار ظلم اشقیا رقیه دامنین دوتار
گجه گیچوبدی یا حسین سحر اذانه آز قالور
((کلامی)) الده بیر قلم خرابه نی یادا سالور
گوزی سنون الونده دی گدا کیمی قاپی چالور
دوشنده مشکله اودا رقیه دامنین دوتار
کلامی
مجلس اربعین مرحوم مغفور
درباره این سایت