احوالات حضرت امام حسن مجتبی (علیه السلام)
هیچ کیمسه غریبلیقدا امام حسن اولماز
آند اولسون حسینه بیله مظلوم ئولن اولماز
ئوز محرمی نامحرم اولوب ایلدی مسموم
اسما کیمی بو دهریده بی رحم زن اولماز
شرم ائتمدی زهرادن اولوب عاق رسوله
ئولدوردی امامی ، بئله پیمان شکن اولماز
نصفِ شبیدی یاتمیشیدی اهل مدینه
بیر فاجعه اولدی که او ایش تازه دن اولماز
رؤیادن اولوب نورِ دل فاطمه بیدار
گوردی سو اگر ایچمسه رفع محن اولماز
زینب ، باشینون اوستونه بیر مُهرلی کوزه
قویموشدی ، عطش دردین اونون تک بیلن اولماز
مظلوم آقا آهیله همان کوزه نی گوتدی
سو آدینه عالمده بئله زهر ایچن اولماز
تا ایستدی ایچسون ، دئدی معناده آناسی
اوغلوم او سودان ایچمه دؤنوب قان لَبَن اولماز
بیر زهر او سوُا توکموشدی رحمسیز اسما
تأثیرینی تعریف ائده بیلمم بیلن اولماز
ایچجک دئدی ، زینب جگریم گل اوتا دؤندی
قارداشا باجی اولماسا ، تسکین وئرن اولماز
زینب گوز آچاندا دئدی ایوای حسنیم وای
بیر حالدا گوروب یارین او حالدا گورن اولماز
گوندردی حسینون ائوینه قاصدِ آهین
عرض ائتدی حسین گل بورا سنسیز گلن اولماز
سالدی بو نِدا کوی بنی هاشمه غوغا
گلدی هامی هئچ یاسدا یئله انجمن اولماز
عباس دئدی قارداشیمون قاتلی کیمدی
کلثوم دئدی آچما بو سرّی ، علن اولماز
ناگاه حسینون گوزی بیر طشته ساتاشدی
ایوای دئدی قارداش بئله قانلی لگن اولماز
زینب الی قوینوندا باخوردی حسنینه
سسلوردی حسین اغلاما بیدار حسن اولماز
بیر آه حسین چکدی حسن گوزلرین آچدی
بلبل که سؤز اهلی اولا گُل بی سخن اولماز
باخدی دئدی قارداش باشیم اوسته اوخی قرآن
دلدن سسیوی آلماسا غم ریشه کن اولماز
قرآن سسیوه قوی باجیم الآن قولاق آسسون
گورسه باشیوی نیزه ده نازین چکن اولماز
وئر غسلیمی کفن ایله منی تُپراقا تاپشور
هر چند سنه کرب و بلاده کفن اولماز
غم چکمه ئوزوم شام غریبانیوه گلّم
یانّام دیَرم هئچ بئله باشسیز بدن اولماز
یثربدن اوزاق دوشماقیوا ایلمه غصّه
واللّهی حسین کرب و بلا تک وطن اولماز
شاعر : استاد کلامی زنجانی
احوالات حضرت فاطمه زهرا (سلام الله)
دئدی ,، ,حسن ,حسین ,بئله ,بو ,امام حسن ,احوالات حضرت ,دئدی قارداش ,علیه السلام ,کرب و
درباره این سایت